त्या शेकडो झाडांना आस आहे पाण्याची

राहुरी - विशेष वृत्त

राहुरी कॉलेज माहिती नाही असा कोणी नसेल ! या कॉलेजची कॅक्टस गार्डन महाराष्ट्राला परिचित आहे . मात्र याच कॅक्टसगार्डनच्या परिसरातील शेकडो झाडे जळण्याच्या मार्गावर आहेत , केवळ पाण्याअभावी !

या राहुरी कॉलेजच्या परिसरात कॉलेज च्या सहकार्यातून माजी विद्यार्थ्यांनी शेकडो झाडांचे वृक्षारोपण यापूर्वी केलेले आहे . मध्यंतरीच्या काळात ही वृक्ष संपदा दमदारपणे चांगलीच बहरलेली होती . महाविद्यालयाच्या सहकार्यातून विद्यार्थी या ठिकाणी स्प्रिंकल किंवा अन्य साधनाद्वारे पाणी द्यायचे . कॉलेजच्या बोअरच्या माध्यमातून देखील पाणी देण्यात येत असे.

मात्र अलीकडच्या काळात या ठिकाणी मोठ्या प्रमाणात शेकडो झाडे अक्षरशः वाळून गेली आहेत , अनेक झाडे जळून चाललेली आहेत . उन्हाच्या तीव्रतेमुळे ही झाडे जळत चालली असून या झाडांना पाण्याची आवश्यकता आहे .
महाविद्यालयात सध्या सुट्टी असल्याने या शेकडो झाडांना पाणी कोण घालणार ? हा प्रश्न चिंता करणारा आहे . या शेकडो झाडांना जगविण्यासाठी स्वयंसेवी संस्था किंवा पर्यावरण प्रेमींनी पुढे येण्याची आवश्यकता व्यक्त केली जात असून , ही झाड जगण्याची आस म्हणून पाण्याच्या प्रतीक्षेत आहेत .